stof tot stof, stof tot nadenke:
'n stowwerige gegriffel
Die middernagtelike gerammel van 'n rustelose koppie. Twee breinselle bots en woordkluise breek oop.
Soli Deo Gloria!

Met dank aan God drie-enig vir al die seŽninge wat Hy so mildelik en onverdiend op ons uitstort!

Snuffel-Snuffel
neuspunte op plekke...
Artikels Indeks
Stof se Tuisblad
Kopiereginligting

Snuffel-snuffel deur die lewe. Opsoek na nog 'n brokkie nuus oor iemand. Dan net gou 'n sappige stertjie byvoeg, en siedaar, 'n heerlike skinderbrokkie. Dan gou die nodige oproepe maak, of gou-gou rondom 'n teetafel so fluiter-fluister die storie van die dag aan almal vertel wat wil luister. So word menige mense daagliks gereduseer tot 'n bron van vermaak van ander. So word ons wat die voorreg het om deur 'n genesings en louteringsproses te gaan, deur ander as so laag geag, dat dit heeltemal regverdigbaar is om ons genesingsproses te ondermyn ter wille van nog 'n ou skinderstorietjie. As ek dan op 'n dag vir jou 'n niksseggende antwoord gee, of 'n skewe antwoord as jou gesnuffel my genoeg irriteer, dink jy dat ek lelik is met jou. Dan dink jy dat jou reg om van 'n lydende 'n objek van spot te maak, geskend is. Ek weet reeds dat jou gesnuffel nie omgee as motief het nie. Ek weet ook dit wat jy so plegtig belowe het vertroulik sal bly, binne minute landswyd per telefoon, epos en op nog hordes denkbare en ondenkbare wyses versprei word na jy gou 'n geurige sousie daaroor gegooi het. Waarom verkwalik jy my dan dat ek my mededelings beperk tot enkeles wat werklik omgee, wat opreg daaroor sal bid, en wat hulle nie laat intimideer deur 'n siellose spul sensasiesoekers nie. As ek dus in die toekoms net oppervlakkig oor die weer en brandstofpryse met jou praat, weet minstens dat ek nog met jou wil praat. Eendag sal daar genadige genesing vir my wees, dan sal ek weer my roeping in die Koninkryk en samelewing volkome kan uitvoer. Dan sal ek daar wees vir jou, as jy deur dale en dieptes gaan. Dan sal ek opreg saam met jou bid, en dit wat jy vertroulik met my deel, slegs met my hemelse Vader deel. Ek is nie kwaad vir jou nie, en het jou lank reeds vergewe. Omdat ek nou beleef wat ek wel beleef, sal ek eendag verstaan as jy na my toe kom om jou uit die moeras te help trek. As jy dan besig is om sekere dinge in jou lewe te verwerk, of dit in gebed met jou Vader deel, sal ek nie snuffel nie. Net daar wees dat jy op my kan steun as jy my nodig het. En as ons dan saam ook jou genesing bereik het, sal ek saam met jou feesvier daaroor.

© Stof 2008/09/15

Kopieregkennisgewing:
Hierdie werke is die intelektuele eiendom van Stof. Klik hier vir volledige kopiereginligting.

.